Show/Hide Menu
ताजा समाचार
काठमाडौं । संघीय संसद अन्तर्गत प्रतिनिधिसभाको बैठक आज पुनः बस्दैछ । शुक्रबार प्रमुख प्रतिपक्षी दल नेकपा एमालेको अवरोधका कारण स्थगित भएको बैठक आज अपराह्न ४ बजे बस्न लागेको हो ।
शुक्रबारको प्रतिनिधिसभा बैठकमा प्रधानमन्त्री पुष्पकमल दाहाल ‘प्रचण्ड’ले नीति तथा कार्यक्रमका बारेमा उठेका प्रश्नको जवाफ दिने सूची थियो । तर, माओवादी सांसद लेखनाथ दाहालले पशुपतिनाथको मन्दिरमा राखिएको जलहरीबारे प्रश्न उठाएपछि एमालेका सांसदहरूले बैठक अवरुद्ध गरेका थिए ।
पशुपतिनाथको जलहरीमा सुनको सट्टा एमाले अध्यक्ष केपी शर्मा ओलीले भ्रष्टाचार गरेको दाबी गर्दै पित्तल हालेको आरोप लगाएपछि एमालेले संसद अवरुद्ध गरेको थियो । त्यसपछि २० मिनेटका लागि स्थगित गरिएको बैठक बस्दै नबसी आजका लागि सारिएको हो ।
सभामुख देवराज घिमिरेको कार्यकक्षमा औपचारिक रुपमै तीनवटा सर्वदलीय बैठक बसेपनि जलहरीबारे उठेको प्रश्न र त्यसउपर संसदले गर्न सक्ने कार्यका सम्बन्धमा निचोड निकाल्न नसपछि बैठक आजका लागि सारिएको हो ।
एमालेले माओवादी सांसद दाहालले माफी माग्नुपर्ने एकसूत्रीय अडान राखिरहेको छ । तर, माओवादी केन्द्रले माफी नमाग्ने बरु यस विषयमा अध्ययन गर्न संसदीय छानबिन समिति गठन गर्ने र त्यसमार्फत अगाडि बढ्नुपर्ने प्रस्ताव गरेको छ ।
आजको बैठकमा प्रधानमन्त्री प्रचण्डले नीति तथा कार्यक्रममाथि उठेका प्रश्नको जवाफ दिने कार्यसूची तय भएको छ ।
