Show/Hide Menu
ताजा समाचार
काठमाडौँ । नेपाल शिक्षक महासंघले धोका दिएपछि निरन्तर रुपमा आन्दोलन गरिरहेका राहतलगायतका शिक्षक र शिक्षा मन्त्रालयबिच भोलि शुक्रबार वार्ता हुने भएको छ ।
नेपाल शिक्षक महासङ्घको नेतृत्वमा असोज १२ गते ११ बजे मन्त्रालयमा वार्ता हुने मन्त्रालयको उच्च स्रोतले जानकारी दिएको छ ।
असन्तुष्ट राहतलगायतका शिक्षकहरूका असहमतिलाई वार्ताबाटै निकास निकाल्न नेपाल शिक्षक महासङ्घ र शिक्षा मन्त्रालय पटकपटक छलफलमा बसेपछि वार्ता गर्ने तयारी भएको जनाइएको छ ।
मन्त्रालयका अनुसार आज आन्दोलनरत पक्ष र महासङ्घसँग अनौपचारिक वार्ता गरेर करिब विषयवस्तु टुङ्गिएको र भोलि त्यसलाई औपचारिक रूपमा बसेर सहमति गर्ने तयारी भएको छ । साथै अनौपचारिक छलफलपछि बिहीबार मन्त्रालयले वार्तामा आएर छलफल गर्न पत्र पठाएको जनाएको छ । मन्त्रालय स्रोतका अनुसार बिहीबारको छलफलबाट निकास निस्किएको छ ।
शिक्षा मन्त्रालयले नेपाल शिक्षक महासङ्घको नेतृत्वमा वार्तामा आउन आग्रह गरे पनि राहत शिक्षक लगायत आन्दोलनरत शिक्षकहरूले अस्वीकार गर्दै आएका थिए । नेपाल शिक्षक महासङ्घको असोज ५ गते सरकारसँग ६ बुँदे सम्झौता भएपछि नेपाल राहत शिक्षक केन्द्रीय समितिले महासङ्घले धोका दिएको भन्दै निरन्तर सडक आन्दोलन गर्दै आएका छन् ।
सोही क्रममा बुधबार प्रहरीले शिक्षकहरुको शान्तिपूर्ण प्रदर्शनमा हस्तक्षेप गरी शिक्षकहरुमाथि निर्मम ढंगले दमन गरेको थियो । त्यसको चौतर्फी विरोध भएको थियो ।
