Show/Hide Menu
ताजा समाचार
काठमाडौं । आज आषाढ शुक्ल पूर्णिमा अर्थात् गुरु पूर्णिमा आफूलाई शिक्षा प्रदान गर्ने गुरुप्रति श्रद्धाभाव प्रकट गरी मनाइँदैछ । धर्मग्रन्थ महाभारतका रचयिता वेदव्यासको जन्मजयन्तीका अवसरमा वैदिक कालदेखि नै मनाउने गरिएको व्यास जयन्तीलाई गुरु पूर्णिमाका रूपमा लिने गरिएको छ ।
‘गु’ को अर्थ अन्धकार र ‘रु’ भन्नाले प्रकाश बुझिन्छ । अन्धकारको नाश गरी जीवनमा उज्यालो फैल्याउने व्यक्तित्वलाई नै गुरु भनिन्छ । यस्ता गुरुलाई हाम्रो शास्त्रले ब्रह्मा, विष्णु र महेश्वरका रूपमा समेत मानेको छ । ब्रह्मा, विष्णु र महेश्वरले समाधान गर्न नसकेको समस्यालाई गुरुले समाधान गर्न सक्छन् भन्ने शास्त्रीय मान्यता छ ।
माता पिताजस्तै गुरुलाई पनि देवता समान मानी ‘आचार्यदेवो भव’ भनिन्छ । गुरु पूर्णिमाका अवसरमा आज विद्यालय एवं विभिन्न संघसंस्थाले कार्यक्रम गरी शिक्षा, दीक्षा दिने गुरुप्रति श्रद्धाभाव प्रकट गर्ने गर्दछन् ।
विद्या तत्व प्रदान गर्ने र व्यक्तिलाई गुण सम्पन्न बनाउने व्यक्ति गुरु हुन् । कुनै पनि ज्ञान शिल्प कला सिक्न विना गुरु सम्भव हुँदैन । त्यसैले व्यक्तिलाई सम्पन्न बनाएर जीवन यात्रामा सफल बनाउन सबैको आधार नै गुरु मानिन्छ । ती गुरु पनि विद्यारूपी सम्पत्तिकै कारण स्तुत्य बनेका हुन् ।
आजै वेदलाई ऋगवेद, यजुर्वेद, सामवेद र अथर्ववेद गरी चार भागमा विभाजन गरी यसको अर्थ बुझाउन सरल संस्कृत भाषामा १८ पुराण र १८ उपपुराणको रचना गर्नुहुने वेदव्यासको सम्झनामा व्यासजयन्ती पनि मनाइन्छ । आषाढ शुक्ल पूर्णिमाकै दिन वेदव्यास जन्मिएकाले यसै दिन व्यासजयन्ती मनाउने गरिएको हो । व्यासले पुराण र उपपुराणका माध्यमबाट ‘परोपकार पुण्याय, पापाय परपीडनम्’ अर्थात् अरूको उपकार गरे धर्म हुन्छ एवं अरूलाई पीडा दिए पाप लाग्छ भनी मानवतावादी सन्देश दिएका छन् ।
महान् गुरु व्यासका पिताको नाम परासर ऋषि र माताको नाम सत्यवति थियो । उनले ब्रह्मचर्यमा रहेर जीवन बिताएका थिए । व्यास अष्ट चिरञ्जीविमध्ये एक हुन् । उनकै नामसँग गाँसिएको र उनले तपस्या गरेको गुफा व्यास गुफा अहिले पनि तनहुँ जिल्लामा रहेको छ ।
