Show/Hide Menu
ताजा समाचार
काठमाडौं । काठमाडौंको टोखा स्थित झोरामा ट्रकमा भेटिएको २५ करोड रुपैयाँ बराबरको डलर र युरोको मालिक पहिचान भएको छ । राजश्व अनुसन्धान विभागका अनुसार, उक्त रकम सिन्धुपाल्चोकको भोटेकोशी गाउँपालिका–४ का नारायण पौडेलको भएको खुलेको हो ।
गत चैत ४ गते राति ना ७ ख १६५२ नम्बरको ट्रकमा लुकाएर लाँदै गरेको अवस्थामा प्रहरीले सिन्धुपाल्चोकका ४३ वर्षीय चालक कुसान लामालाई पक्राउ गरेको थियो । लामाले चालक सिट पछाडि फल्स बटम बनाएर रकम लुकेको अवस्थामा प्रहरीले उनलाई पक्राउ गरेको थियो ।
अहिलेसम्मको अनुसन्धानमा उक्त रकम पौडेलले दिएको खुल्न आएको छ, र पौडेललाई पक्राउ गर्नका लागि अदालतबाट पुर्जी जारी भइसकेको छ ।
चालक लामाको बैंक खाताको विवरणमा अस्वभाविक कारोबार देखिएकोले विभागले सीडीआर विश्लेषण गर्दै पौडेलसँगको सम्पर्क खुलाएको छ । उक्त व्यक्तिलाई पक्राउ गरेर विभागमा जिम्मा लगाउन प्रहरीले पत्राचार गरेको छ ।
अलि अगाडि अनुसन्धान गर्दै, सीसीटीभी फुटेज र डिजिटल डिभाइसको विश्लेषण गरी विभागले पौडेलको घर, कारोबार स्थल, गोदामलगायत स्थानमा खानतलासी गरेको छ । यस क्रममा विभिन्न सामग्री पनि बरामद गरिएको विभागले जानकारी दिएको छ ।
