Show/Hide Menu
ताजा समाचार
काठमाडौं । सरकारले नेपाल प्रहरीको ३२औं महानिरीक्षक (आईजीपी) मा चन्द्रकुवेर खापुङलाई नियुक्त गर्ने निर्णय गरेको छ । शुक्रबार बसेको मन्त्रिपरिषद् बैठकले उनलाई भदौ १९ गतेदेखि लागू हुने गरी नियुक्त गरेको एक मन्त्रीले जानकारी दिएका छन् ।
हालका आईजीपी दीपक थापाले भदौ १८ गते राति १२ बजेबाट अवकाश पाउँदै छन् । प्रधानमन्त्री केपी शर्मा ओलीको चीन भ्रमण शनिबारदेखि सुरु हुने भएकाले त्यसअघि नै मन्त्रिपरिषद्ले आईजीपी नियुक्तिको टुंगो लगाएको हो ।
खापुङ हाल केन्द्रीय अनुसन्धान ब्यूरो (CIB) का प्रमुखको रूपमा कार्यरत छन् । उनी र हालका आईजीपी थापा एउटै ब्याचबाट इन्स्पेक्टरमा भर्ना भएका थिए। तर, त्यही ब्याचका इन्स्पेक्टरहरूलाई तीन चरणमा नियुक्ति दिइएको थियो ।
पहिलो चरणमा ५ चैत २०५१ मा नियुक्त भएका ५३ जना मध्येबाट बसन्तबहादुर कुँवर आईजीपी बनेका थिए । दोस्रो चरणमा १९ भदौ २०५२ मा नियुक्त भएकाहरूबाट दीपक थापा आईजीपी बनेका थिए भने तेस्रो चरणमा नियुक्त भएका खापुङ एकल प्रतिस्पर्धी बनेपछि उनी आईजीपी नियुक्त भएका हुन्।
खापुङसँगै नियुक्त भएका लालमणि आचार्य यसअघि नै ५६ वर्षे उमेर हदका कारण अनिवार्य अवकाशमा गइसकेका छन्। एआईजी कृष्णहरि शर्मा पोखरेल पनि यही भदौ १५ गतेबाट अनिवार्य अवकाशमा जाँदै छन्। यस कारण खापुङ आफ्नो ब्याचका अन्तिम सम्भावित उम्मेदवार थिए।
यदि नयाँ प्रहरी ऐन जारी भइ हालको प्रावधान अनुसार सेवा अवधि ६ महिना थपिएन भने खापुङले पनि ३० वर्षे सेवा अवधि पुरा गरी २६ कात्तिक राति १२ बजेबाट अवकाश पाउने छन्।
