Show/Hide Menu
ताजा समाचार
काठमाडौं । कोसी प्रदेशसभा बैठक सुरू भएको छ। बैठकमा मुख्यमन्त्री केदार कार्कीले प्रदेशसभा नियमावली २०७४ को नियम १२८ उपनियम (४) बमोजिम विश्वासको मत लिने प्रस्ताव सदनसमक्ष राखेका छन् ।
९३ जना प्रदेसभा सांसद रहेको प्रदेशसभामा मुख्यमन्त्रीलाई विश्वासको मत लिन ४७ सांसदको समर्थन चाहिन्छ। तर, कार्कीलाई गठबन्धनबाट विद्रोह गरेका शेखर कोइराला पक्षका कांग्रेसका ८ र एमालेका ३९ जना प्रदेशसभा सदस्यको समर्थन छ। यसैले उनी विश्वासको मत पाउनेमा ढुक्क छन्।
कोसी प्रदेशसभामा एमालेका ४० (उपसभामुखसहित),कांग्रेसका २९,नेकपा माओवादी केन्द्रका १३, राष्ट्रिय प्रजातन्त्र पार्टीका ६,नेकपा एकीकृत समाजवादीका ४ र जसपाका १ जना सांसद छन्। कांग्रेस पनि कार्कीलाई विश्वासको मत दिने र सत्ता पक्षको लाइनमा बस्ने निर्णय गरेको छ।
कार्की नेतृत्व कोसी प्रदेश सरकार गठन प्रक्रियामा राप्रपा भने तटस्थ छ।
गठबन्धनबाट विद्रोह गरेका कांग्रेसका ८ र एमालेका ३९ जना प्रदेशसभा सदस्यको समर्थनमा कार्की गत शनिबार प्रदेशको मुख्यमन्त्री बनेका हुन्। कार्कीले आइतबार पद तथा गोपनीयताको शपथ लिएका हुन्। मुख्यमन्त्री कार्कीले एमालेका रामबहादुर राना र कांग्रेसका शम्शेर राईलाई मन्त्रीसमेत नियुक्त गरेका छन्।
तर, नवनियुक्त मन्त्रीहरूको मन्त्रालय भने तोकेको छैन । कार्की संविधानको धारा १६८ को उपधारा ५ बमोजिम मुख्यमन्त्री नियुक्त भएका हुन् ।
