Show/Hide Menu
ताजा समाचार
बुढानीलकण्ठ। बुढानीलकण्ठ नगरपालिकामा प्रथम देवी स्पोर्ट्स भेट्रान कप-२०८१ हुने भएको छ। बुढानीलकण्ठ नगरपालिका वडा नम्बर ३ ले प्रायोजन गर्ने उक्त प्रतियोगिताको आयोजना र ब्यबस्थापन देवी स्पोर्ट्सले गर्ने आयोजकले पत्रकार सम्मेलन मार्फत जानकारी दिएको छ। देवी स्पोर्ट्स हाउस रुद्रेश्वर बुढानीलकण्ठमा आयोजना गरिने ५ ए साइड प्रतियोगिता यहि मङ्सिर २१ र २२ गते अन्तराष्ट्रिय फ़ुट्सल नियमलाई अनुसरण गरि संचालन गरिने बताइएको छ।
बुढानीलकण्ठ नगरपालिकामा बसोबास गर्ने २ जना ३५ बर्ष माथिको र अन्य खेलाडीहरुको उमेर हद भने ४० बर्ष माथिको हुनुपर्ने छ। प्रतियोगितामा प्रथम र द्वितीय हुने समुहलाई क्रमश ३० हजार र १५ हजार नगद सहित मेडल र प्रमाण पत्र प्रदान गरिने आयोजकले जानकारी दिएको छ।
आज आयोजना गरिएको बिशेष पत्रकार सम्मेलनमा देवी स्पोर्ट्स हाउस रुद्रेश्वर बुढानीलकण्ठका संचालक किरण थापाले अध्यक्षता गरेका थिए भने बुढानीलकण्ठ नगरपालिका वडा नम्बर ३ का सदस्य बिक्रम श्रेष्ठले स्वागत मन्तव्य राखेका थिए।
कार्यक्रमका प्रमुख अतिथि बुढानीलकण्ठ नगरपालिका वडा नम्बर ३ का अध्यक्ष आकाश धितालले भेट्रान कपले युवा पुस्तामा नयाँ उर्जा प्रदान गर्ने र भेट्रानहरुको अनुभवलाई प्रस्तुत गर्ने अबसर प्रदान गर्ने बताएका थिए। साथै वडा नम्बर ३ खेलकुदको बिकासमा निरन्तर लागिरहने प्रतिबद्वता व्यक्त गर्दै कार्यक्रमको समापन गरेका थिए।
उक्त कार्यक्रममा आयोजकहरु, पत्रकारहरु, बुढानीलकण्ठ नगरपालिका वडा नम्बर ३ का जनप्रतिनिधिहरु लगायतको उपश्थिति रहेको थियो।
उक्त प्रतियोगितामा सहभागी हुन बुढानीलकण्ठ नगरपालिकाबासी इच्छुक सबैलाई दस्तुर रु ३,००० सहित टिम दर्ता गर्न आयोजकले अनुरोध गरेको छ।
