काठमाडौं । बागमती प्रदेशलाई आज औपचारिक रूपमा पूर्ण खोपयुक्त प्रदेश घोषणा गरिएको छ। स्वास्थ्य सेवा विस्तारको महत्वपूर्ण उपलब्धि स्वरूप प्रदेश स्वास्थ्य मन्त्रालयद्वारा आयोजित विशेष समारोहमा प्रधानमन्त्री केपी शर्मा ओलीले प्रदेशलाई पूर्ण खोपयुक्त घोषणा गरे।

यसअघि बागमतीका १३ जिल्ला र ११९ पालिकालाई अलग–अलग चरणमा पूर्ण खोपयुक्त घोषणा गरिसकिएपछि आज समग्र प्रदेशलाई औपचारिक रूपमा यो उपाधि दिइएको हो । कार्यक्रममा प्रधानमन्त्री ओलीले खोप समितिको प्रमाणपत्र प्रदेशका स्वास्थ्य मन्त्री किरण थापालाई हस्तान्तरण गरे।

प्रधानमन्त्री ओलीले खोप कार्यक्रम सफल रूपमा सम्पन्न भएकोमा बधाई दिँदै निरोगी नेपाल अभियान समृद्ध नेपाल, सुखी नेपाली राष्ट्रिय लक्ष्य प्राप्तिको आधार बन्ने बताए। उनले भने, “हाम्रो संविधानले स्वास्थ्य सेवा मौलिक हकको रूपमा व्यवस्था गरेको छ, र खोप अभियान त्यस हक प्राप्तिको दिशामा सार्थक कदम हो।”

प्रधानमन्त्रीले स्वस्थ समाज निर्माणका लागि जनचेतना जगाउनुपर्नेमा जोड दिँदै भने, “रोग लाग्न सक्छ, तर त्यसका कारण र बाटा रोक्न सकिन्छ। खोप त्यसको एक प्रभावकारी उपाय हो। हामीले शहर र गाउँ दुबै सफा राख्दै मानिस, पशुपक्षी र वनस्पति पनि निरोगी बनाउने सोच अघि बढाउनुपर्छ।”

उनले नेपाल सन् २०८३ (२०२६) मा विकासशील मुलुकमा स्तरोन्नत हुने लक्ष्यमा रहेको उल्लेख गर्दै, “त्यसका लागि पनि स्वास्थ्य क्षेत्रका यस्ता उपलब्धिहरू अत्यन्त महत्त्वपूर्ण छन्। अन्य प्रदेशहरूलाई पनि यस्ता अभियानमा प्रेरित गर्नुपर्छ,” भने।

कार्यक्रमले बागमती प्रदेशको स्वास्थ्य सेवा सुधारको सफलतालाई उजागर गर्नुका साथै अन्य प्रदेशहरूमा पनि यस्ता कार्यक्रम विस्तार गर्नुपर्ने सन्देश दिएको छ।

---

---