Show/Hide Menu
ताजा समाचार
काठमाडौं । लिग चरणबाटै नेपाल प्रिमियर लिग (एनपीएल) सिजन २ को यात्रा टुङ्गायउने जोखिमका साथ साबिक विजेता जनकपुर बोल्ट्सविरुद्ध उत्रिएको लुम्बिनी लायन्सले जित निकाल्दै प्लेअफमा स्थान सुरक्षित गरेको छ ।
त्रिवि अन्तर्राष्ट्रिय क्रिकेट रंगशालामा शुक्रबार भएको खेलमा जनकपुरविरुद्ध ४ विकेटको जित निकाल्दै लुम्बिनीले ८ अंकसहित तालिकाको चौथो स्थानमै यथावत रहेर प्लेअफमा स्थान बनाएको हो । लुम्बिनीले ७ खेलमा ४ जित निकालेको छ ।
टस हारेर १३३ रनको लक्ष्य पछ्याउँदै जवाफी ब्याटिङमा उत्रिएको लुम्बिनीले १९ ओभर १ बलमा ६ विकेटको क्षतिमा १३७ रन बनाउँदै जित निकालेको हो ।
यससँगै प्लेअफमा सुदूरपश्चिम रोयल्स, काठमाडौं गोर्खाज, विराटनगर किङ्स र लुम्बिनीको प्रतिस्पर्धा हुने भएको छ ।
सुदूरपश्चिम ६ खेलमा शतप्रतिशत जित निकाल्दै १२ अंकका साथ तालिकाको शीर्ष स्थानमा छ । काठमाडौं ५ खेलमा पाँच जित निकाल्दै १० अंकका साथ तालिकाको दोस्रो स्थानमा छ ।
विराटनगर ६ खेलमा ४ जित निकाल्दै ८ अंकका साथ तालिकाको तेस्रो स्थानमा छ ।
पोखरा, चितवन राइनोज, कर्णाली याक्स र जनकपुर बोल्ट्सले भने लिग चरणबाटै एनपीएल २ को यात्रा सकेर घर फर्किएका छन् ।
६ खेलमा २ जितको अवस्थामा ४ अंकसहित तालिकाको पाँचौ स्थानमा पोखरा छ । ६ खेलमा २ जित र ४ हारको अवस्थामा ४ अंकसहित नेट रन रेटका आधारमा चितवन राइनोज छटौं स्थानमा छ ।
७ औं स्थानमा रहेको कर्णाली ६ खेलमा १ जित निकाल्दै २ अंक जोडेर लिग चरणबाट बाहिरिने पहिलो टिम बनेको हो ।
जनकपुर ६ खेलमा १ जित निकाल्दै २ अंकसहित तालिकाको अन्तिम स्थानमा छ ।
अब यी चार टोलीको भेट सिजन ३ मा हुनेछ ।
