Show/Hide Menu
ताजा समाचार
काठमाडौं– सत्तारुढ नेपाल कम्युनिष्ट पार्टी (नेकपा)को छैटौं स्थायी कमिटी बैठकमा दुई अध्यक्षको प्रस्ताव प्रस्तुत गरिएको छ ।
पार्टी कार्यालय धुम्बाराहीमा आइतबार बसेको बैठकमा अध्यक्ष एवं प्रधानमन्त्री केपी शर्मा ओली र अर्का अध्यक्ष पुष्पकमल दाहाल ‘प्रचण्ड’को प्रस्ताव छलफलका लागि वितरण गरिएको छ । प्रवक्ता नारायणकाजी श्रेष्ठका अनुसार दुई अध्यक्षका प्रस्ताव र विभिन्न पत्रहरु अध्ययनका लागि सात दिनको समय दिइएको छ ।
बैठकमा प्रधानमन्त्री एवं अध्यक्ष ओलीले पूर्वमान्यताअनुसार नै अध्यक्ष दाहालको पत्र औपचारिक बैठकमा छलफल गर्न नसक्ने भन्दै त्यस्तो बैठकमा आफू सहभागी नहुने अडान राख्नुभएको छ । उक्त पत्र सचिवालय सदस्यसमेत रहनुभएका उपप्रधानमन्त्री ईश्वर पोखरेलले वाचन गर्नुभएको थियो ।
अध्यक्ष ओली अनुपस्थित भएपछि दाहालको अध्यक्षतामा बैठक बसेको थियो ।
बैठकमा अध्यक्ष दाहालले पार्टीको विशिष्ट, गम्भीर र संकटपूर्ण पार्टी जीवनलाई सकारात्मक ढंगले समाधान गर्ने गरी छलफल गर्नुपर्नेमा जोड दिनुभएको थियो ।
बैठकले मंसिर २५ गतेका लागि तोकिएको केन्द्रीय कमिटीको बैठक पुस ५ गतेका लागि सारिएको छ ।
स्थायी कमिटीको अर्को बैठक आगामी मंसिर २८ गते दिउँसो १ बजे बस्नेछ ।
