Show/Hide Menu
ताजा समाचार
काठमाडौं । नेकपा (माओवादी केन्द्र) भित्रको नेतृत्वप्रति असन्तुष्टि र वैचारिक अन्तर स्पष्ट देखिन थालेको छ । अध्यक्ष पुष्पकमल दाहाल प्रचण्ड र उपमहासचिव जनार्दन शर्मा प्रभाकरबीचको सार्वजनिक टकराव माओवादी केन्द्रभित्रको आन्तरिक गतिशीलता र भविष्यको दिशालाई तय गर्ने संकेत बन्न सक्छ ।
उपमहासचिव शर्माले पार्टीभित्रको आन्तरिक लोकतन्त्रको अभाव र नेतृत्वको कमजोरीका कारण आजको राजनीतिक संकट पैदा भएको टिप्पणी गरेका छन्। बिहीबार काठमाडौंमा आयोजित अन्तरक्रिया कार्यक्रममा बोल्दै शर्माले कम्युनिस्ट आन्दोलन भित्रैको “महारोग” ले समस्या उत्पन्न गरेको आरोप लगाए।
उनले भने, “समाजवादको कुरा गर्ने तर व्यक्तिगत स्वार्थमा केन्द्रित हुने प्रवृत्तिले प्रयास असफल भयो, कम्युनिस्ट आन्दोलन धराशायी बनाइयो।” ०७९ को निर्वाचन गठबन्धनको सम्झना गर्दै उनले पार्टीले अवसर पाएको भए पनि त्यसलाई टिकाउन नसकेको बताए।
अध्यक्ष प्रचण्डप्रति लक्षित गर्दै उनले भने, “चुनावपछि सरकारको नेतृत्व गर्ने अवसर थियो, केही कामको थालनी पनि भयो। तर ‘के गर्छस् मंगले आफ्नै ढंगले’ भनेजस्तो गठबन्धन फेर्ने अभियानले आज हामी यस्तो स्थितिमा आइपुगेका छौं।”
उनले पार्टीले जनताको एजेन्डा सम्बोधन गर्न नसकेको, उल्टो “विभिन्न काण्डै काण्ड” हेरिरहनु परेको अवस्था आएको बताए। शर्माले अबको कम्युनिस्ट आन्दोलनको पुनर्गठन नयाँ पुस्ताले गर्नुपर्ने आवश्यकता औंल्याउँदै इगोको टकरावबाट टाढा रहनुपर्ने बताए।
उनले भने, “अब नेताहरूलाई गाली होइन, उहाँहरूको भूमिका सम्मान गर्ने तर उहाँहरूले गरेका गल्तीहरूबाट सिक्ने हो। पार्टीलाई लोकतान्त्रिकरण गर्दै विचार, कार्यदिशा, नीति र संगठन जनमुखी बनाउनुपर्ने आवश्यकता छ।”
यसअघि बिहीबार बिहान विराटनगर विमानस्थलमा सञ्चारकर्मीहरूसँग कुरा गर्दै अध्यक्ष प्रचण्डले उपमहासचिव शर्मालाई लक्षित गर्दै पार्टीभित्र स्वार्थमा आधारित ‘स्वार्थ समूह’ सक्रिय रहेको आरोप लगाएका थिए ।
उनले पार्टीको सिद्धान्त, पद्धति र नेतृत्वभन्दा बाहिर रहेर स्वार्थमा केन्द्रित बैठक गर्नेहरूलाई नै स्वार्थ समूह भनेको स्पष्ट पारेका थिए।
शर्माको आलोचनालाई ठाडै अस्वीकार गर्दै प्रचण्डले भनेका थिए, “एक जना प्रभाकरले नपत्याएको भन्दै पार्टीको आन्दोलन वा इतिहास रोकिन्न।”
यस विषयमा आउँदो पदाधिकारी बैठकमा समीक्षा हुने जानकारी दिँदै उनले समीक्षा पश्चात मात्रै आवश्यक निर्णय सार्वजनिक गरिने बताए। कारबाहीबारे हाल कुनै स्पष्ट धारणा व्यक्त गरेनन् ।
