Show/Hide Menu
ताजा समाचार
काठमाडौं । नेपाल प्रिमियर लिग (एनपीएल)को दोस्रो संस्करणको चौथो खेलमा काठमान्डु गोर्खाजलाई २९ हराउँदै सुदूरपश्चिम रोयल्सले नेपाल प्रिमियर लिग (एनपीएल)मा विजयी सुरुवात गरेको छ।
त्रिवि क्रिकेट मैदानमा टस हारेर ब्याटिङ गरेको सुदूरपश्चिम निर्धारित २० ओभरमा १४७ रन बनाउँदै अलआउट भएको थियो।
सुदूरपश्चिमले दिएको १४८ रनको विजयी लक्ष्य पछ्याएको काठमान्डु १६.५ ओभरमा ११८ रन बनाउँदै अलआउट भयो।
काठमान्डुका लागि ओपनर आकाश त्रिपाठीले सर्वाधिक ३४ रन बनाए। उनले ३० बलमा १ चौका र २ छक्का प्रहार गरे। एकतर्फबाट विकेट गइरहँदा क्रिजमा टिकेर काठमान्डुको इनिङ्स सम्हाल्दै खेलेका थिए।
वेन चार्लेसवर्थ ८ रन बनाउँदै हेमन्त धामीको बलमा क्याच आउट भए। दोस्रो विकेट वान डाउन आएका भीम सार्कीको गयो। उनले १० बलमा १ छक्कासहित १२ रन बनाउँदै हेमन्तको बलमा आरिफ शेखको हातमा क्याच भए।
सन्तोष यादव १ रनमा रनआउट भए। दीपेन्द्र सिंह ऐरीको थ्रोमा विकेटकिपर विनोद भण्डारीले ४.५ ओभरमा सन्तोषलाई रनआउट गराए। काठमान्डुले पावरप्लेमा ३ विकेट गुमाउँदै ५० रन बनाएको हो।
मिलडअर्डरमा भने कुनै पनि ब्याटरले काठमान्डुको लागि टिकेर रन बनाउन सकेनन्।
पावरप्लेपश्चात जोन सिम्पसन र आकाश त्रिपाठीले ४९ रनको साझेदारी गरेका थिए। चौथो विकेट जोन सिम्पसनको विकेट गयो। उनले १८ बलमा २ चौका र १ छक्कासहित २४ रन बनाएका थिए। पाँचौंं विकेटको लागि आकाश त्रिपाठीको विकेट गयो।
आदिल आलम डकआउट हुँदा काठमान्डुको ब्याटिङ धरापमा भएको हो। रासिद खान ६ रनमा स्कट केगुइलिनको बलमा एलबीडब्ल्यू भए। मिलिन्द कुमार ११ रनमा नरेन साउदको बलमा स्कट केगुइलिनको हातमा बाउन्ड्रीमा क्याच भए। अन्तिम विकेटको रूपमा सन्नी पटेल १० रनमा क्याच हुँदा काठमान्डुको इनिङ्स सकिएको हो।
सुदूरपश्चिम रोयल्सकाे लागि बलिङतर्फ हर्मीत सिंह, हेमन्त धामी, स्कट केगुइलिनले २–२ विकेट लिए। इशान पाण्डे, नरेन साउद र अभिनाश बोहोराले १–१ विकेट लिए।
त्यसअघि, ब्याटिङ गरेको सुदूरपश्चिम रोयल्सका लागि हर्मीत सिंहले सर्वाधिक ५३ रन बनाए। उनले २० बलमा २ चौका र ६ छक्का प्रहार गरे।
सातौं विकेटका लागि दीपेन्द्र सिंह ऐरी र हर्मीत सिंहले ६१ रनको साझेदारी गर्दै टिमलाई १ सयमाथि स्कोरमा पुर्याएका हुन्।
३ ओभरको खेल सकिँदा ४ रनमात्रै जोड्दै ३ विकेट गुमाएको सुदूरका लागि चौथो विकेटको रूपमा इशान पाण्डको विकेट गयो। इशानले ९ बलमा १ चौका र १ छक्कासहित ११ रन बनाए। पाँचौं विकेटको लागि आरिफ शेख र दीपेन्द्र सिंह ऐरीले २३ रनको सानो साझेदारी बनाए।
आरिफले व्याक्तिगत २५ रन बनाए। दीपेन्द्र सिंह ऐरीले ३९ रन बनाए। अन्य कुनैपनि ब्याटरको ब्याटबाट दोहोरो रन बनेन। हेमन्त धामी ३ रनमा अविजित हुँदा अभिनाश बोहोरा १ रनमा बोल्ड भएका हुन्।
काठमान्डुका लागि करण केसीले सर्वाधिक ४ विकेट लिए। मिलिन्द कुमार, सन्नी पटेल र रासिद खानले २–२ विकेट लिए।
काठमान्डुले पहिलो खेलमा जनकपुर बोल्ट्सलाई ५ विकेटले हराएको थियो। यो काठमान्डुको पहिलो हार हो। बिहीबार एक खेल हुनेछ। जसमा चितवन राइनोज र लुम्बिनी लायन्सले खेल्नेछन्।
