काठमाडौं– रिलायन्स एजुकेशन नेटवर्कमा सञ्चालित रिलायन्स पब्लिक नमुना संयुक्त राष्ट्रसंघ (आरपीमुन) को नवौँ राष्ट्रिय सम्मेलन सम्पन्न भएको छ । साउन ३१ गतेबाट सुरु भएको आरपीमुन भदौ १ गते एक समारोहकाबीच समापन भएको हो ।

रिलायन्स एजुकेशन नेटवर्कका सञ्चालक एवम् सिनियर चार्टर एकाउन्टेन्ट राजु कुमार शिवाकोटीले अध्यक्षता गरेको समापन कार्यक्रममा  काठमाडौं उपत्यका लगायतका रुपन्देही, चितवन, धनुषा, नवलपुर लगायतका २५ शैक्षिक संस्थाका २२८ जना विद्यार्थीले सहभागिता जनाएका थिए ।

काठमाडौंको कपनस्थित रिलायन्स पब्लिक स्कुलको सभाहलमा सम्पन्न कार्यक्रममा विद्यार्थीहरुले डाइसेक, डब्लूएचओ, युएनओएसए, आइपीसी, युएनएचआरसी, यूनेप, संघीय संसद् नेपाल तथा ऐतिहासिक विपत समिति गरी ८ वटा समितिमा रहेर छलफलमा सहभागिता जनाएका थिए । ‘जहाँ युवा मस्तिष्कहरु वार्ताको लागि भेला हुन्छन्’ भन्ने मुल नाराका साथ ३ दिनसम्म चलेको सम्मेलनमा मानव जगतका जल्दाबल्दा समस्यामा व्यापक छलफल गरी विश्वबन्धुत्वको भावना, मानव अधिकार, जलवायु परिवर्तनलाई के कसरी न्यूनीकरण गर्ने भन्ने विषयमा केन्द्रित भएर व्यापक छलफल गरी घोषणा पत्र जारी गर्दै सम्मेलन समापन भएको छ ।

कार्यक्रमको समापन गर्दै रिलायन्स एजुकेशन नेटवर्कका सञ्चालक एवम् सिनियर चार्टर एकाउन्टेन्ट राजु कुमार शिवाकोटीले सम्मेलनले ८ वटा समितिमा रहेका अध्यक्ष, सह–अध्यक्ष र मध्यस्थकर्तालाई मायाको चिनो हस्तान्तरण गर्दै यस्ता कार्यक्रमले आपसी समझदारी गरी समस्याको निराकरण गर्न थप सहयोग पुग्ने बताएका थिए ।

समापन समारोहमा २२८ प्रतिनिधिहरुमध्ये उत्कृष्ट प्रतिनिधि र अतिविशिष्ट प्रतिनिधि सदस्यहरुलाई पुरस्कृत गर्दै रिलायन्स पब्लिक स्कुलका प्रधानाध्यापक वसन्तलाल लामिछानेले विद्यार्थीहरुमा कुटनीतिक क्षमताको अभिवृद्धि एवम् सामुहिक रुपमा बहस गर्ने क्षमताको विकास हुने कुरा बताए । सम्मेलनको सञ्चालन आरपीमुन नवौं संस्करणका कन्फरेन्स डाइरेक्टर दिलिप नेपालले गरेका थिए । आरपीमुन नवौँ संस्करणका महासचिव तृष्णा बजगाईँले अर्को वर्ष दशौँ संस्करण भव्यताका साथ सम्पन्न गर्ने प्रतिवद्धता व्यक्त गर्दै कार्यक्रम समापन गरेकी थिइन् ।

---

---